Lalduhoma chuan, kan ramah ruihhlo vanga harsatna tawk kan tam avangin sorkar chuan tun leh tuna kan mamawh ber nia ngaiin Hulhhliap Short Stay Centre kalpui thain kan hria a. Sorkarin amah maia a tih theih loh avangin YMA/MHIP leh Synod te chu phungbawma sawmin PPP mode-in a kalpui ta ni, a ti.

Ruihhlo ngaite chu an nghei theih nan kan tanpui a ni satliah lo va, a nghei hlenten eizawnna an neih theihna turin Skill Training changkang tak kan pe nghal a. Hetiang taka ruihhlo ngaite enkawlna kalpui hi a dang sawi tur a vang viau mai thei. A sim duh tak takte tan chuan tun hun tluka hun tha hi a awm lo a ni, a ti bawk.

Supply lam dan chah tumin hma kan la nasa thin a, a man pawh kan man nasa a, a Sangha lian pawh kan man zauh zauh tawh a ni. Tunah hian ram dang atanga a rawn luhnate dan chah tumin Operation Jeriko kan kalpui leh mek, Lalduhoma chuan a ti.

Chief Minister chuan, Ruihhlo la ti ve lo, thangtharte hnenah pawh drugs that lohzia uar takin zirtir a ni a, Nasha Mukt Bharat Abhiyan hmangin district tinah campaign neih a ni. Ruihhlo bawiha tan hauh loh dan chu - tih chhin miah loh - a ni a, thangtharte hnenah i hrilh mawlh mawlh ang u, a ti.

Lalrinpuii, Minister pawhin thusawiin damlo enkawlte chu rilru nghet tak pua ruihhlo laka fihlim zui zel turin a fuih bawk.

Hulhhliap Short Stay Centre kalpui nan hian sorkar chuan Rs. 108 lakh a pe a. Batch 4 na hi September thla hian neih leh tum niin a tul anga kalpui chhoh zel tur a ni ang.

Batch hmasa ber leh a dawttua lutte an chhuizuinaah vawiin thlengin zaa sawmsarih leh pali (74%) te chu ruihhlo lakah an fihlim zui zel tih hmuhchhuah annih thu vawiina sorkar thuchhuah chuan a tarlang.